پاکستان د افغانستان پر وړاندې د ترانزیټي لارو په تړلو سره یو ځل بیا پر اقتصادي بهیر اغېز واچاوه، چې تر ټولو لوی زیان یې د ساختماني سکتور واوښت. د لارو د بندېدو له امله د سیمنټو واردات ټکني شول او په کورني بازار کې یې بیې په بېساري ډول لوړې شوې، چې ګڼې پروژې یې له ځنډ او حتی درېدلو سره مخ کړې.
د ساختماني توکو، په ځانګړي ډول د سیمنټو د کمښت له کبله، د کورونو، سړکونو او عامه پروژو کارونه اغېزمن شول. قراردادیان وایي چې د سیمنټو لوړې بیې د دې لامل شوې چې د پروژو لګښتونه څو چنده شي او ځینې شرکتونه له مالي ستونزو سره مخ شي. دا وضعیت د افغانستان پر اقتصادي ثبات هم منفي اغېز کړی دی.
په همدې حساس وخت کې، ترکیې اعلان وکړ چې غواړي په افغانستان کې د ۲۰۰ میلیونه ډالرو په ارزښت د سیمنټو یوه ستره فابریکه جوړه کړي. د ترکیې د پانګونې دا پرېکړه د افغانستان لپاره مهمه بلل کېږي، ځکه دا به د کورني تولید کچه لوړه او پر وارداتو تکیه کمه کړي.
د یادې فابریکې له جوړېدو سره به نه یوازې د افغانستان د سیمنټو اړتیا تر ډېره پوره شي، بلکې زرګونه کسانو ته به د کار زمینه هم برابره شي. اقتصادي شنونکي باور لري چې دا پانګونه به د ساختماني سکتور ثبات ته لاره هواره کړي او د بیو د کنټرول سبب به شي.
کارپوهان وایي چې د ترکیې دا ګام کولی شي افغانستان د پاکستان له اقتصادي فشارونو څخه تر یوه بریده خلاص کړي. که افغانستان وتوانېږي چې خپل اساسي صنعتي اړتیاوې په کور دننه پوره کړي، نو دا به د اقتصادي خپلواکۍ پر لور یو مهم ګام وي او د راتلونکو بهرنیو فشارونو اغېز به هم راکم کړي.