روسي رسنیو د افغانستان او روسیې ترمنځ د نوي نظامي تړون د لاسلیک په اړه تازه جزئیات خپاره کړي دي. د راپورونو له مخې، دا تړون د دواړو هېوادونو ترمنځ د پوځي همکاریو د پراخېدو لپاره مهم ګام بلل کېږي او په امنیتي او دفاعي برخو کې د همکاریو نوې دروازې پرانیزي.
د دغو راپورونو له مخې، روسي خبریالانو د روسیې د دفاع وزارت له چارواکو څخه پوښتنه کړې چې آیا په یاد تړون کې افغانستان ته د پرمختللو دفاعي سیسټمونو ورکول هم شامل دي که نه. روسي چارواکو په ځواب کې ویلي چې دوی د تړون ټول جزئیات نه شي افشا کولی، خو په ورته وخت کې یې دا احتمال هم نه دی رد کړی.
د روسیې د دفاع وزارت دغه دریځ د ګڼو شنونکو او رسنیو پام ځان ته اړولی دی. د چارواکو له څرګندونو داسې ښکاري چې د دفاعي سیسټمونو په اړه ځینې موضوعات لا هم محرمانه ساتل شوي او ښایي په راتلونکو پړاوونو کې نور معلومات هم خپاره شي.
معتبرو نړیوالو رسنیو هم راپور ورکړی چې د افغانستان د دفاع وزیر له روسي لوري سره په خبرو کې د دفاعي تجهیزاتو او سیسټمونو د ترلاسه کولو موضوع مطرح کړې وه. د دغو راپورونو له مخې، روسیې ته د افغانستان د اړتیاوو په اړه قناعت ورکړل شوی او د دواړو خواوو ترمنځ پر یو شمېر مهمو امنیتي مسایلو تفاهم رامنځته شوی دی.
سربېره پر دې، روسیې منلې چې په افغانستان کې پاتې روسي جوړې وسلې به ترمیم کړي او د دغو تجهیزاتو د عصري کولو په برخه کې به نوې تخنیکي مرستې هم برابرې کړي. څارونکي باور لري چې دا ګامونه به د افغانستان د دفاعي وړتیاوو په پیاوړتیا کې مهم رول ولوبوي او د دواړو هېوادونو ترمنځ به پوځي همکاري لا نوره هم پراخه کړي.
