د پاکستان پخواني سفیر په کابل کې د یوې مرکې پر مهال ویلي، چې د کابل د سقوط په ورځ د پاکستان د استخباراتو مشر جنرال فيض حميد د افغانستان له پخواني ولسمشر حامد کرزي سره لیدلي وو. د هغه په وینا، دا لیدنه په داسې حساسو شېبو کې شوې وه چې د افغانستان سیاسي راتلونکی لا هم ناڅرګند و او بېلابېلې طرحې تر بحث لاندې وې.
نوموړي سفیر ادعا کوي، چې په دغه لیدنه کې حامد کرزي ټینګار کاوه چې تر هر څه وړاندې باید یو موقتي حکومت جوړ شي. د هغه په خبره، کرزي باور درلود چې د واک تشه باید د لنډمهالي حکومت له لارې ډکه شي، څو هېواد د بشپړ سیاسي ګډوډۍ او بېنظمۍ پر لور ولاړ نه شي.
د پاکستان د پخواني سفیر په وینا، حامد کرزي څو ځله دا غوښتنه تکرار کړې وه چې د موقتي حکومت مشري باید ده ته وسپارل شي. کرزي استدلال کاوه چې د خپل سیاسي تجربې او د نړیوالو اړیکو له امله کولی شي د انتقال دا پړاو په نسبي ثبات سره مدیریت کړي.
په راپور کې ویل شوي، چې د دې خبرو پر مهال د پاکستان د استخباراتو مشر فيض حميد د سیمې د امنیتي وضعیت، د کابل د سقوط اغېزو او د راتلونکي احتمالي جوړښت په اړه خپل نظرونه شریک کړي وو. خو سفیر دا نه دي روښانه کړي چې ایا د کرزي وړاندیز ته کوم عملي ځواب یا ملاتړ هم ورکړل شوی و که نه.
دا څرګندونې په داسې حال کې مطرح کېږي چې د کابل د سقوط د شېبو او شاته پټو خبرو په اړه لا هم بېلابېل روایتونه شته. شنونکي وايي، د دغه ډول معلوماتو خپرېدل کولای شي د ۲۰۲۱ کال د سیاسي بدلونونو پر ځینو ناڅرګندو اړخونو رڼا واچوي، خو کره قضاوت به هغه وخت ممکن وي چې نور ښکېل لوري هم په دې اړه خپل دریځونه روښانه کړي.