د امریکا د ویسکانسن ایالت په ګرین بې ښار کې د HSHS سېنټ وینسنټ روغتون د خوښۍ یو ځانګړی خبر اعلان کړی دی. یاد روغتون ویلي چې د ښځو او ماشومانو د مرکز ۱۴ ثبت شوې نرسانې امېدواره دي، چې دا حالت د روغتون لپاره یو ډول «بېبي بوم» بلل شوی دی. دا اعلان د ملي نرسانو د اوونۍ په مناسبت او د مور د ورځې څخه مخکې خپور شوی دی.
د روغتون د ښځو او ماشومانو د مرکز مشرې، اېمي بارډن، دا شېبه بېسارې او د خوښۍ وړ بللې ده. هغې ویلي چې دا وضعیت یو بشپړ پړاو ته ورته دی، ځکه ډېری دا نرسانې چې تر اوسه یې د نورو میندو او ماشومانو پالنه کوله، اوس خپله د لومړي ځل لپاره د مور کېدو تجربې ته داخلېږي.
بارډن زیاته کړه چې یادې نرسانې له مخکې څخه د ماشومانو د پاملرنې ماهرې وې، خو اوس به د میندې کېدو عملي تجربه د دوی پوهه او احساس لا ژور کړي. د هغې په وینا، دا تجربه به نه یوازې د دوی شخصي ژوند ته بدلون ورکړي، بلکې د ناروغانو د پاملرنې په برخه کې به یې هم لا اغېزمنې کړي.
د روغتون په اعلامیه کې راغلي چې د ښځو او ماشومانو د مرکز نرسانې یوازې روزل شوې روغتیايي کارکوونکې نه دي، بلکې ښوونکې، ملاتړې او د نويو والدینو باور وړ ملګرې هم دي. دوی له لومړۍ ورځې له میندو او پلرونو سره مرسته کوي، څو د ماشوم د زېږون او پالنې په اړه ځان ډاډمن او خوندي احساس کړي.
اېمي بارډن همداراز ویلي چې کله د دغو امېدوارو نرسانو د زېږون وخت راورسي، نو د دوی پاملرنه به د خپلو همکارانو له لوري کېږي، چې دا کار د ارامتیا او باور فضا رامنځته کوي. هغې ټینګار وکړ چې دا نرسانې لا د زېږون څخه مخکې له خپلو همکارانو سره ځانګړي اړیکي جوړ کړي دي، او دا چې ټولې به دا ځانګړې شېبې د یو بل ترڅنګ تجربه کوي، د روغتون لپاره د ټولنیز یووالي ښکلی انځور وړاندې کوي.