په جرمني کې يوه ټايلنډۍ مېرمن وروسته له هغه له قانوني ستونزو سره مخ شوه چې يو نارينه مراجع پر هغې شکايت ثبت کړ. د راپورونو له مخې، دغه پېښه په هغه مساج سنټر کې رامنځته شوې چې رسمي جواز يې يوازې د مساج خدمتونو لپاره ورکړل شوی و. د همدې شکايت پر بنسټ، چارواکو موضوع وڅېړله او پرېکړه يې اعلان کړه.
شکايت کوونکي نارينه ادعا کړې چې کله دی د مساج لپاره د يادې ښځې د کار ځای ته ورغی، نو هغې له مساج مخکې نامناسب چلند وکړ. د هغه په وينا، دې ښځې د ده شخصي حريم تر پښو لاندې کړ او داسې کړنې يې ترسره کړې چې د مساج له چوکاټه بهر وې.
نارينه زياته کړې چې وروسته له دې، ښځې ورته د خولې له لارې د جنسي اړيکې وړاندیز هم وکړ، حال دا چې دغه مساج سنټر يوازې د عادي مساج لپاره فعاليت درلود او جنسي خدمتونه پکې قانوناً منع وو. نوموړي وويل چې دی د همدې نامناسب وړاندیز له امله اندېښمن شو او پرېکړه يې وکړه چې موضوع له چارواکو سره شريکه کړي.
د جرمني اړوندو ادارو د شکايت تر ترلاسه کولو وروسته پلټنې پيل کړې. د څېړنو له بشپړېدو وروسته، حکومت ياد مساج سنټر ته ۸۰۰ يورو نغدي جريمه واوروله، ځکه چې د جواز له شرطونو څخه سرغړونه شوې وه.
چارواکو ټينګار کړی چې په جرمني کې د خدمتونو هر مرکز بايد د خپل قانوني جواز له حدودو څخه بهر فعاليت ونه کړي. دوی زياته کړې چې د مشتريانو خوندیتوب او د قانون مراعات د ټولو سوداګريزو مرکزونو لپاره لومړيتوب دی، او هر ډول سرغړونه به له قانوني چلند سره مخ شي.