پاکستان ته يو بل سياسي او استخباراتي سرخوږی ور زيات شوی، وروسته له هغه چې روسيې ادعا کړې يو شمېر پاکستاني جاسوسان يې نيولي دي. د روسي امنيتي ادارو په وينا، ياد کسان هڅه کوله چې د روسيې د دفاعي سيستمونو حساسه ټيکنالوژي غلا او له هېواده بهر ولېږدوي.
دا پېښه په داسې وخت کې مخې ته راځي چې سيمهييز او نړيوال امنيتي حساسيتونه لا هم لوړ دي.
د روسيې چارواکي وايي، نيول شويو کسانو په منظم ډول د پوځي تجهيزاتو، دفاعي سيستمونو او پرمختللو تخنيکي معلوماتو د ترلاسه کولو هڅې کولې. د دوی په وينا، دا ډول کړنې نه يوازې د روسيې ملي امنيت ته ګواښ دی، بلکې د نړيوالو قوانينو ښکاره سرغړونه هم بلل کېږي. روسيې ټينګار کړی چې په دې قضيه کې به له هېچا سره نرمي ونه شي.
په همدې تړاو د روسيې ولسمشر ولاديمير پوتين د پاکستان سفارت ته رسمي پيغام لېږلی او ترې يې غوښتي چې عاجل وضاحت وړاندې کړي. د کرملين له خوا ويل شوي چې مسکو د دې موضوع جدي سپيناوی غواړي او تمه لري چې اسلاماباد به په شفاف ډول د دې تورونو ځواب ووايي. دا غوښتنه د دواړو هېوادونو ترمنځ د ديپلوماتيکو اړيکو د حساس پړاو نښه بلل کېږي.
له بلې خوا، پاکستان تر اوسه په رسمي ډول د روسيې د ادعاوو په اړه تفصيلي غبرګون نه دی ښودلی. يو شمېر سياسي شنونکي باور لري چې دا موضوع کولی شي د پاکستان او روسيې ترمنځ اړيکې تر فشار لاندې راولي، په ځانګړي ډول په هغه وخت کې چې دواړه هېوادونه د دفاع، انرژۍ او سيمهييزو مسايلو په برخه کې د نږدې کېدو هڅې کوي.
کارپوهان وايي، که دا ادعاوې ثابته شي، نو دا به د پاکستان لپاره يو بل ديپلوماتيک او سياسي تاوان وي. دوی زياتوي چې داسې پېښې د هېواد نړيوال انځور ته زيان رسوي او پر بهرنۍ پاليسۍ هم اغېز کولی شي. اوس ټولې سترګې د پاکستان رسمي ځواب ته دي چې ايا دا بحران به ارام کړي او که به د دواړو هېوادونو ترمنځ لا نورې ستونزې راولاړې کړي.