د افغانستان پخواني ولسمشر اشرف غني خبرداری ورکړی چې که امريکا پر ايران پوځي بريد وکړي، نو افغانستان به له بېلابېلو جدي خطرونو سره مخ شي. نوموړي ويلي، د سيمې هره لويه جګړه په مستقيم او غير مستقيم ډول پر افغانستان اغېز کوي، ځکه هېواد لا هم له امنيتي، اقتصادي او سياسي پلوه نازک حالت کې دی.
اشرف غني زياته کړې چې د ايران او امريکا ترمنځ احتمالي شخړه کولی شي د افغانستان پولې ناامنه کړي، د کډوالو نوې څپې رامنځته کړي او د وسله والو ډلو د تحرک لپاره زمينه برابره کړي. د ده په وينا، دا ډول وضعيت به د افغانستان پر کورني ثبات او د خلکو پر ورځني ژوند ناوړه اغېز ولري.
پخواني ولسمشر همدارنګه ويلي چې اقتصادي زيانونه به هم جدي وي، ځکه د جګړې په صورت کې د سيمهييزو سوداګريزو لارو بندېدل، د تېلو او خوراکي توکو بيې لوړېدل او د پانګونې کمېدل حتمي ښکاري. هغه ټينګار کړی چې افغان ولس لا د دې توان نه لري چې د بلې سيمهييزې کړکېچ بيه ورکړي.
اشرف غني د افغان حکومت څخه غوښتي چې په رسمي ډول د بشپړې بېطرفۍ اعلان وکړي او دا دريځ په څرګنده توګه نړيوالو ته ورسوي. د هغه په اند، بېطرفي کولای شي افغانستان له سياسي فشارونو، پوځي ګواښونو او د نيابتي جګړو له خطره وساتي.
نوموړي په پای کې ويلي چې د افغانستان ملي ګټې بايد د هر ډول بهرنۍ شخړې څخه پورته وبلل شي او د هېواد مشرتابه دې د ديپلوماسۍ، هوښيارۍ او ملي يووالي له لارې د افغانستان د امن او ثبات ساتنه وکړي. د هغه په باور، يوازې يو روښانه او متوازن دريځ کولی شي هېواد له راتلونکو خطرونو وژغوري.