يوې عربې مېرمنې شکايت کړی چې خاوند يې د دوی د خصوصي ژوند خبرې له ملګرو او پېژندګلو سره شريکوي، او دا کار يې له سخت ذهني فشار او خپګان سره مخ کړی دی. نوموړې وايي، کوروالی د مېړه او مېرمنې ترمنځ يو شخصي او محرم عمل دی، خو خاوند يې دا کرښه نه مراعتوي.
مېرمن زياتوي چې خاوند يې کله خپلو ملګرو ته وايي چې دوی په حمام کې کوروالی کوي، او کله بيا د بام د سر کيسې کوي. د هغې په وينا، دا ډول خبرې نه يوازې د شرم سبب ګرځي، بلکې د ښځې عزت، احساسات او اعتماد ته هم جدي زيان رسوي.
د نوموړې په باور، ډېر نارينه ښايي دا ډول خبرې د ځان د ستاينې يا د ملګرو ترمنځ د برلاسۍ لپاره کوي، خو نه پوهېږي چې دا کار د ښځې پر روان، عزت او د واده پر اړيکه څومره ناوړه اغېز لري. هغې وويل: «زه احساس کوم چې زما شخصيت او محرمیت د ټوکو موضوع ګرځېدلی.»
ارواپوهان وايي چې د کوروالي جزيات شريکول د باور ماتول بلل کېږي او کولای شي د مېړه او مېرمنې ترمنځ فاصله پيدا کړي. د دوی په اند، که يو لوری ځان خوندي او محترم احساس نه کړي، نو مينه، ارامي او صميميت ورو ورو له منځه ځي.
مېرمن له نورو ښځو غواړي چې که له ورته حالت سره مخ وي، خاموشه پاتې نه شي او په ارامۍ خو جدي ډول له خپل خاوند سره خبرې وکړي. د هغې په وينا، که درناوی، محرمیت او حدود ونه ساتل شي، نو واده يوازې يو نوم پاتې کېږي، نه يو خوندي او باعزته تړون.