رجب طیب اردوغان ويلي چې په ترکيه کې د افغانستان او پاکستان ترمنځ په ترسره شوو مذاکراتو کې د پاکستان له لوري يوه داسې غوښتنه مطرح شوه چې د افغان پلاوي سخت غبرګون يې راوپاروه. د ترکيې ولسمشر د خبرو پر مهال څرګنده کړه چې دا غوښتنه د ديپلوماتيکو اصولو خلاف وه او د دواړو هېوادونو ترمنځ يې فضا ترينګلې کړه.
د اردوغان په وينا، پاکستاني لوري له افغانستانه غوښتنه کړې وه چې د افغانستان پر خاوره د پاکستان د بمباريو په اړه دې شديد او ښکاره غبرګون نه ښيي. دا غوښتنه د افغان استازو له نظره د ملي حاکميت او عزت خلاف بلل شوې او هماغه شېبه يې ناخوښي څرګنده کړې ده.
سرچينې وايي چې افغان پلاوي ټينګار وکړ چې هېڅ هېواد حق نه لري د افغانستان پر خاوره پوځي بريدونه وکړي او بيا ترې تمه ولري چې چوپ پاتې شي. افغان لوري دا هم روښانه کړې چې د ولس احساسات او ملي ګټې د هر ډول سياسي مصلحت نه پورته دي.
اردوغان زياته کړه چې ترکيه هڅه کوله د دواړو خواوو ترمنځ د منځګړي رول ولوبوي او خبرې بېرته د تفاهم پر لور يوسي. د هغه په وينا، اختلافات طبيعي دي، خو د متقابل درناوي پرته د سيمهييز ثبات تصور ناشونی دی.
په پای کې، د ترکيې ولسمشر وويل چې انقره به خپلو هڅو ته دوام ورکړي څو افغانستان او پاکستان د خبرو له لارې ستونزې حل کړي. هغه ټينګار وکړ چې زور، فشار او کبرجنې غوښتنې نه يوازې ستونزې نه حلوي، بلکې واټنونه نور هم زياتوي.