د پاکستان د کورنيو چارو وزير د يوې خبري ناستې پر مهال په ژړا شو او ويې منله چې د بلوچستان وضعيت له جدي بحران سره مخ دی. نوموړي وويل چې امنيتي حالت تر ټولو خطرناک پړاو ته رسېدلی او حکومت د سختو ننګونو سره مخامخ دی. د وزير احساساتي څرګندونو په سياسي او ټولنيزو کړيو کې پراخ غبرګونونه راپارولي دي.
دا مهال بلوڅ بېلتون پالې ډلې د بلوچستان په بېلابېلو سيمو کې په پراخو عملياتو بوخت دي. راپورونه وايي چې په يو وخت ګڼې حملې، بنديزونه او نښتې روانې دي، چې له امله يې د حکومت کنټرول کمزوری شوی دی. ځايي خلک وايي چې ځينې ولسوالۍ عملاً د حکومتي ادارو له واکه وتلې دي.
د امنيتي سرچينو په وينا، بلوڅ وسله والې ډلې د پوځي کاروانونو، دولتي تاسيساتو او مهمو لارو پر ضد بريدونه زيات کړي دي. د دغو عملياتو له امله نه يوازې امنيتي ځواکونه تر فشار لاندې راغلي، بلکې عام ولس هم له سختو ستونزو سره مخ دی او د ورځني ژوند چارې يې ټکنۍ شوې دي.
سياسي شنونکي باور لري چې د بلوچستان کړکېچ يوازې امنيتي ستونزه نه ده، بلکې ژور سياسي، اقتصادي او تاريخي لاملونه لري. د دوی په وينا، تر هغه چې د بلوڅانو شکايتونو ته جدي سياسي حل ونه لټول شي، د پوځي عملياتو له لارې د وضعيت کابو کول به ستونزمن وي.
په همدې حال کې، د پاکستان مرکزي حکومت د وضعيت د کنټرول ژمنې کړې، خو د کورنيو چارو د وزير ژړا او څرګندونې دا اندېښنه پياوړې کړې چې بلوچستان ښايي د بشپړ سقوط له خطر سره مخ وي. څارونکي وايي، که روان حالت همداسې دوام وکړي، نو دا به د پاکستان پر ټول سياسي او امنيتي جوړښت ژور اغېز وکړي.